Cyfrifoldeb Byd-eang Cymru

Er bod anghydraddoldeb cyfoeth eithafol yn parhau i gynyddu, mae miliynau o bobl ledled y byd yn byw gyda llywodraethiant ansefydlog ac heb fynediad digonol at hanfodion fel dŵr glân, bwyd a gofal iechyd.

Mae llawer yn wynebu cyfuniad angheuol o wrthdaro hirfaith â dinistr parhaus a di-baid a achosir gan y newid cyflym yn ein hinsawdd. Mae ysgydwadau byd-eang fel yr argyfwng costau byw yn ychwanegu tanwydd at y tân.

Yn fwy na hynny, y rhai sy'n cael eu gorthrymu, gan anghydraddoldebau sydd wedi'u gwreiddio'n systemig, fel gwahaniaethu ar sail hil a rhyw, yw'r rhai sy'n aml yn cael eu heffeithio gwaethaf. Daw hyn i gyd at ei gilydd i greu sefyllfa bregus eithafol ar adegau newydd o argyfwng i'r rhai sydd eisoes yn byw mewn tlodi.

Mae cymorth ariannol i wledydd incwm isel yn arf pwysig i helpu i adeiladu byd tecach.

Mae gan bobl Cymru enw da, yn haeddiannol, am roi’n hael i argyfyngau tramor, gan gynnwys drwy apeliadau a wneir gan y Pwyllgor Argyfwng Trychinebau (DEC), y mae Oxfam yn aelod ohono.

Mae Llywodraeth Cymru yn rhoi symiau bach, ond arwyddocaol, o gymorth ariannol i wledydd incwm isel mewn cyfnodau o drychineb. Mae hefyd yn rhoi arian i helpu i fynd i’r afael â thlodi byd-eang, anghydraddoldeb ac anghyfiawnder hinsawdd,tdrwy ei rhaglen Cymru ac Affrica.

Er bod arian yn hanfodol, gwyddom fod datblygiad byd-eang yn ymwneud â mwy na dim ond rhoi cefnogaeth ariannol i wledydd incwm isel.

Mae'n ymwneud â'r hyn a brynwn, sut rydym yn masnachu, sut mae ein busnesau'n gweithredu, ein hôl troed hinsawdd fyd-eang, sut rydym yn cefnogi ffoaduriaid sy'n byw yng Nghymru, ac effaith ein polisi domestig ehangach a'n penderfyniadau gwariant. Mae angen i ni sicrhau bod ein holl gamau gweithredu yn cefnogi datblygiad byd-eang teg a chynaliadwy.

Dyna pam rydym yn gweithio'n agos gyda Chomisiynydd Cenedlaethau'r Dyfodol Cymru, i godi proffil effaith ehangach Cymru ar lefel fyd-eang, yn gadarnhaol ac yn negyddol, gan yna weithio i'w wella.

Yn ogystal â'r hyn a wnawn, mae'r hyn a ddywedwn yn bwysig. Er efallai na fydd Cymru'n gallu cyfrannu adnoddau ariannol helaeth at ymdrechion byd-eang i leihau tlodi, mae arwain y byd wrth osod iaith y drafodaeth yn sicr o fewn ein gafael. Yma yn Oxfam Cymru rydym bob amser yn gweithio i sicrhau bod llunwyr polisi yng Nghymru yn lleisio barn ar faterion sy'n wirioneddol bwysig, boed hynny i gefnogi mynediad teg at frechlynnau yn fyd-eang neu i ysgogi diwedd ar wrthdaro dinistriol, fel y rhyfel yn Gaza.

Yn Oxfam Cymru rydym hefyd yn cydnabod addysg fel arf pwerus a all helpu i yrru newid trawsnewidiol. Rhaid inni gefnogi pobl ifanc i fod yn ddinasyddion byd-eang gweithredol sy'n deall y byd ehangach, a'u lle ynddo.

Mae Oxfam Cymru yn gweithio mewn partneriaeth â rhwydwaith llydan o sefydliadau eraill yng Nghymru sy'n gweithio i sicrhau ein bod yn gweithredu fel dinesydd byd-eang cyfrifol